Gde smo ono stali ….ha ….
ponedjeljak, 17.11.2014.
I gda se z Pimpeka zaputiš spram..Zagreba.. no..dobro..dobro.. kaj se mam jeziš.. dakle.. pemo prema Kvaternjaku..pa ti oko zapinje na tem starim hižama.. baš je lepo videt gda negdo makar zvana malo ofarba tu starinu.. pa malo vredi žlebe.. črepe na krovu.. a v prizemlju makar i da otpre kakšnu žderilnicu.. To je navek ..se reče.. profitabilno..a i ljudi se dobro osječaju gda ih zapuhne oni fini topli šmak z nutra.. Ti vrapca.. kak je meni težko prejti pokraj teh.. Dubravica.. Mlinara.. Pimpeka.. i vsih drugih kaj delaju te fine stvari.. Znaš.. nis ja nikakšni karakter gda se treba donesti važna odluka.. žderat i pit..al samo prejti pokraj tega kak pokraj Turskeg groblja.. maaa. Taj čas sam nutra i makar jen falaček nečeg slanog al slatkog.. Narafski to navek ima svoje posledice a to je ogromna žeđa.. Ha.. evo viš.. sam štel povedat o tim hižama.. baš gledim.. Ona velka ogromna kaj je tu pred dva..al tri leta zgrađena na mestu taki starih hiža.. ta još kak tak dobro zgledi.. prava gradska velka hiža.. I nekak ju je lagše spregristi neg nekaj ovakveg kaj sledi ….
Pa da si človek lasi zpukne z tikve gda ovak nekaj vidi.. A bormeš je to tu nekak na brzinu zraslo.. sam ja videl da se tu nekaj sprema.. pa te onda jeno vreme ni v inšpekciji.. i pogleč.. Pita se človek koji je bedak nekakšnem drugom bedaku tak nekaj dopustil..ha .. Vrag ga jebal.. kak da je komad stekla opal z neba.. Maa.. nis ja došel z Zanzibara pa da se čudim ..al zbilam ovo tu nemrem sprežvakat.. Pa bi najrajši našeg gradonačelnika.. teg dotepenca z bregof.. za vuho sim dovlekel da to vidi.. kaj nejgovi pomočniki to delaju po našemu Gradu.. Al kaj vredi.. nemaju vsi oni skup filinga za nekaj lepo.. tak sam se zapjenil da bi najrajše zutra sim dožel z pračkom i malo opral to staklovinje …
Tak mi nekak žalostno zgledi ta Maksimirska vulica.. pa ne zbog tega kaj je zdaj jesensko doba i dreva nisu zelena.. I v sred leta ti tu ništ bolše ne zgledi.. ta dreva su več tak stara da su se napol posušila.. i nisu za drugo neg posječ i nova zasadit.. Viš kak su to naredili i drugde po Gradi.. projde par let dreva lepo narasteju i onda je deset..dvajset let vse kak treba.. Jee.. Maksimirska vulica je kakti malo v šturcu.. nema tu nikaj preveč važneg.. tu ti velki glavonje ne stanujeju.. pa kaj bi se onda tu trebalo brinut kak kaj zgledi.. A baš je Maksimirska jena od najprometnijih vulica v našemu Gradu.. trajvani pelaju jen za drugim.. avti se kotrlaju navek.. brez da bude kaj lufta.. i po kmici.. i po suncu.. radni dan ..al nedela.. tu težko moreš komotnu prejti prek ceste.. Viš.. ja sam se malo na cestu stal i del to na kipec..a več mi je nekakšni majmun začel trubit kak da pela hitnu pomoč.. pa baš mu se nis štel maknut…..
Zdaj smo tu na vuglu.. mi se čini Valdecove i Maksimirske.. ta stara hiža kaj ju vidiš.. eee.. ta je tu bila prije vsih ostalih hiža.. Dok je još Maksimirska bila obična prašnjava cesta v ti hiži je bila brtija.. se reklo.. Konačište.. Tu bi namerniki v Zagreb zastali.. malo se počinuli.. zrihtali se prije neg bi vušli u Grad Zagreb.. Brtija se zvala.. Gostiona pri Jureku i Štefeku.. pa se je dost nagađalo gdo su bili Jurek i Štefek.. neki su pripovedali da su to dva prijatela.. drugi da su to dva brata.. i bi ga vrag znal kaj je bilo praf.. Pa ni važno.. Hiža je par put obnavljana .. davno več to ni konačište .. al je brtija i gostiona tu vse do denes.. Otraga gde su negda bile štale za kojne.. kasnejše je lepo vređena vrtna bašča spodi velke brajde.. To su mesto Zagrepčanci dobro poznali jer su to nazivali..Izletište pri Jureku i Štefeku.. Praf za praf.. to je negda bila velka provincija i tu su se Zagrepčanci dolazili gostit i častit..oblokavat i veselit.. Okol su bile livade i vočnjaki pa je to bil..se danas reče.. izlet v prirodu na kraju Grada.. Ja se sječam da je to delalo dosta leta.. pa je najemput zaprto.. i letima je bilo prazno i zapušteno..sam je na fasadi ostal i još je denes natpis kaj se jedva vidi.. Gostiona pri Jureku i Štefeku.. Negde pred kakšnih deset let je negdo štel to spet obnovit..pa je kakti vse bilo zrihtano kak negda.. Je delalo jeno kratko vreme..pa je spet zaprto.. i denes je pak zapuščeno.. i vnutra i pozadi je ona bašča prešla vrit .. Praf za praf.. kak i fajn drugih restavracija.. brtija.. gostiona.. bufeta… je nestalo a zamenili su ih kafiči brez duše i srca… Ni poznato čija je to denes ta stara hiža.. nigdo nutar ne stanuje.. nigdo dole v štacunima ništ ne dela.. a gostiona se samo spomina v kakšnim škrabotinama
Zdaj bum malo zastal tu spredi ove hiže pozadi te ofucane breze.. Eee.. tu je stanovala jena lepa mala.. je imela guste črne lasi vse sfrčkane…loknice.. razmeš.. Jee..posvud je imela te loknice.. No.. sam ja nju upoznal na nekakšnem plesnjaku..pa kak to več svršava.. sam ja nju pratil domof..skroz od Grada cipelcugom tu na periferiju…ha … Pa ni bil problem zajti na trajvan.. ona bi se pelala nutra ja na pulferu..al kaj.. bi preveč brzo stigli.. Dakle.. več prvi dan pemo mi čez Vlašku..več na Kvaternjaku sam ju celu sprešlatal.. iskal sam one loknice.. razmeš.. Pa kak ni bilo preveč velke pobune.. več smo v nejzinom dvorišču pozadi hiže vse stvari stavili na svoje mjesto.. Čuj.. bum rekel onak..praf.. nis je ja zatreskal v tu malu.. jenostavno se njoj dopalo..a meni.. kaj da ti velim….. Pa je to tak potrajalo par tjedni.. i evo mene jemput pri njoj v hiži.. makar ovak hiža ne zgledi velka..al je ima fajn pozadi.. Ima ona svoju sobu .. No dobro.. nebumo fort pri meni domof .. Veli ona da su mamica i tatek nekam prešli i da buju fest kasno došli.. Jee..a kaj.. ja sam tu.. ak me gdo posle hiti van.. ha.. nebu mi prvi put da nekakšni tatek pobjesni gda me najde v nejgovi fotelji..
Gledim ja malo po stanu..ima nekolko soba.. vse to skupi moderni mebl.. debeli tepihi po zviksanim parketima.. Velke slike po zidima.. A nasred jenog zida v ogromnem špajzcimeru je velka slika oneg črlenog maršala.. malo dalše na zidu je zaheftan pravi prafcati mitraljez.. i još par oneh starih puški tanđara..a na jenom ormareku je.. prava pištola.. onak kak za ukras narihtana.. I posvud naokol oni mali stakleni stalki u med staklom fotografije nekakšneg partizana.. Ti vrapca.. pitam ja ovu malu da gdo je taj človek.. Veli ona da je to nejzin tatek.. partizan.. pukovnik.. al ni vojak neg je direktor fabrike cipeliša Zagreb… No.. za čas sam ja nejga pozabil gad smo se začeli valjati po nejzinoj sobi po podu.. I vse je kak i navek prešlo kak se spada i zdaj sedimo na podu pokraj gramofona.. slušamo muziku i premečemo ploče..
Najemput se vrata otpireju kak da ih je Veli Jože z nogom ritnul.. i gliboki glas naredi.. Gasi odmah to.. kasno je ..ljudi spavaju.. I čez vrata u sobu zajde velki človek.. naj mi Bog grehe oprosti.. zgledel je kak ogromni majmun.. Črni..kak i kćer.. kosmati.. obrve kak partviši.. glas kak oni stric Bedanec z Kekeca…. Ostal je zevati gda je mene spazil na podu..a ja sam taki zeval od kak je on zašel v sobu.. Aha.. veli on.. to je to.. a tko si ti.. pita on.. No.. kčerka se je mam snašla i veli da sam ja nju dopratil domof kakti da nju nebu strah po kmici hoditi.. Šuti taj ogromni črni tatek.. pozove mene v špajzcimer i pita kaj si bum spil.. Fala nikaj.. delam se ja fin.. Nudi me z cigaretlinom..pa ja nit to ..fala nebum.. ne pušim.. Hmm. A rajši bi zaraufal cigaretlina neg Boga videl ..
Nejzina se mamica.. nekakšna sitna plava ženskica samo naluknula i rekla da je umorna i da pe spat.. Bilo je več prešla jedanajsta vura po noči.. I ja velim kak ja zdaj odlazim daj e kasno..Al stari veli.. sjedi tu da malo porazgovaramo.. No dobro.. ja sam več došel ksebi.. i ak bu kakšne frke.. lahko bum ja zbrisal.. več sam se nagledel naokol z čim bum starog heznul po tintari…A ona moja mala stalno nekašne grimase dela spram mene a ja nis ništ kužil dal je to na dobro al na zlo vleklo.. I zdaj pita mene taj ogromni majmunski partizan.. vse onak.. v koju školu idem..kakšni sam đak.. gde stanujem.. z čim se zabavlam ..jesam kakšni športaš..i još celu vreču bedastih pitanja.. Narafski ja sam skorom vse zlagal kaj sam mu odgovaral po pitanju moje persone.. Skoro pa sam bi pomočnik svetog Petra v raju.. Stari važno klima z tikvom i najemput me pita.. A tko je Tvoj otac.. Ha.. kaj bum zdaj zmišlaval.. lepo mu velim da je moj japa fačuk taljanskog grofa.. da je moja baka plemenitašica.. a da je i moja mamica nekakšna princeza .. Sluša to of.. a ja si gruntam..dal on to mene spitava kaj misli da bi njemu morti bil kakšni zet..ha.. Ona moja nafrčkana mala stoji v vuglu sobe i dalše premeče gramofonske ploče po stalaži.. I pak najemput opali taj pukovnik pitanje.. A jeli Tvoj otac bio u partizanima za vreme rata.. Hmmm.. kaj zdaj.. to je fest sklisko pitanje.. Al znam ja kak je moj tatek bil ponosni na svoje ratovanje..pa nebum ja zdaj nikaj zmišlaval.. Lepo ja ovem velkom črnom partizanu velim da je moj japa kakti dobar Taljanski državljan prešel služit Benita pa je čak bil z njim prijatel.. a gda su Benita za noge obesili.. moj je japa prešel Adolfu još jeno dva leta.. pa je na koncu služil črlenom maršalu pet let na robiji v Jugoslaviji..
Vrabec ga dal.. se ja više ne sječam kaj sam si ja taj čas vrtel po tikvi..al ovi tetek od te moje male se je zdigel z kauča.. stal se je spodi slike črlenog maršala i spodi mitraljeza.. podbočil se i zagrmel.. Sad si tu i nikad više.. ovaj čas nestani da ne gledam.. I rista se onak opasno podbočil z rukami.. Nis ja dva put čekal da mi to ponovi.. Zgrabil sam svoje cipeliše pokraj ulaza u onak samo v čarapama skliznul čez štenge na Maksimirsku..
Kaj je dalše bilo nigdar nis saznal.. Tu sam malu nakon puno let susrel v kinu Balkan.. pozdravili smo se a ona mi je prectavila svojeg muža.. Vrag ga dal.. taj je mamlaz još gorše zgledel neg nejzin tatek ……
Pemo dalše ………………….. trong>
ZAFRKANCIJA * * #
